Алматыда заңсыз ойын бизнесін ұйымдастырушылар сотталды
Жедел тергеу іс-шаралары барысында көлеңкелі айналымнан ставкаларды қабылдау, ұтыстарды есептеу және беру функциялары және онлайн-казино ұйымдастыруға мүмкіндік беретін қосымшалары бар 104 ойын компьютерлерінің жиынтығы тәркіленіп алынды.
Қаржылық мониторинг агенттігінің Алматы қаласы бойынша аумақтық департаменті компьютерлік клубтың қызметі түріндегі заңсыз ойын бизнесін ұйымдастырушыларға қатысты сотқа дейінгі тергеп-тексеруді аяқтады, деп хабарлайды Almaty-akshamy.kz аталмыш агенттіктің баспасөз қызметіне сілтеме жасап.
Заңсыз ойын бизнесін ұйымдастырушылар ҚР ҚК 307-бабының 3-бөлігінің 2-тармағымен (аса ірі мөлшерде кіріс алумен заңсыз ойын бизнесін ұйымдастыру) қарастырылған қылмысты жасағаны үшін кінәлі деп танылып, 4,6 жылға бас бостандығынан айырылды.
Бұдан басқа, 5,5 млн.теңгеден астам мөлшерде заңсыз кіріске ие болған заңсыз ойын бизнесі үшін үй-жайды жалға берген жалға берушіге қатысты үкім шығарылды.
Сот оған 1 жыл 6 ай мерзімге бас бостандығын шектеу жазасын тағайындады.
ҚР ҚМА Қылмыстық кодекске сәйкес, ойын бизнесін ұйымдастырғаны үшін, сондай-ақ заңсыз құмар ойындарға жалға үй-жай ұсынғаны үшін қылмыстық жауапкершілік қарастырылғанын ескертеді.
