Алматыда шығынды өтеу үшін ШОБ субъектілерінің 755 өтінімі қаржыландырылды
Қаңтар айындағы оқиғалар кезінде зардап шеккен бизнеске қаржылай қолдаудың жалпы сомасы 2 029 313 422 теңгені құрады. Бұл туралы Алматы өңірлік коммуникациялар қызметінің баспасөз конференциясы барысында Қалалық Кәсіпкерлер палатасының директоры Айтуар Қошмамбетов мәлімдеді деп хабарлайды almaty-akshamy.kz.
23 қаңтар мен 23 ақпан аралығында алматылық кәсіпкерлер Infokazakstan.kz сайтын пайдалана отырып, 1 752 өтінім берді. Кейбіреулер өтініштерін бірнеше рет берген. Сондықтан сайтта қазіргі уақытта өтінімдердің жалпы саны – 1 752. Ақпарат қоңырау шалып, нақтыланғаннан кейін жалпы сомасы 34 316 437 000 теңгеге 1 413 кәсіпкердің зардап шеккені анықталды.
«Қазіргі уақытта Комиссия жалпы сомасы 2 029 313 422 теңгеге 755 өтінімді қарады, онда мемлекеттік бюджеттен 1 274 398 461 теңге сомаға 379 өтінім қаржыландырылды. Қалғандары «Жаңа Алатау» және «Күш бірлікте» қорларымен қаржыландырылады», - деп хабарлады А. Қошмамбетов.
Мақұлданған өтінімдер арасында сауда саласы (зергерлік бұйымдар, ұялы телефондар, киім) – 310 өтінім, бизнес-орталықтар – 36 өтінім, қоғамдық тамақтану объектілері – 26 өтінім басым.
Айтуар Қошмамбетов ҚР Президентінің шұғыл көмек көрсету жөніндегі тапсырмасы аясында бизнеске шығынның барлық санаттары үшін 10 млн теңгеге дейінгі төлем сомасымен жеңілдетілген есеп бойынша шығынды өтеуді жүзеге асыру, сондай-ақ «жабдық» санаты үшін оңайлатылған тетікті қолдану және адвокаттардың қызметтеріне ақы төлеудің орнын толтыру ұсынылғанын атап өтті. Бұл шаралар өтінімдерді қарау мерзімін бір айдан екі аптаға дейін қысқартуға мүмкіндік береді.
