Алматыда құны 6 млрд теңге болатын жер телімі мемлекет меншігіне қайтарылды
Бұрын ол жерде әскери госпиталь болған
Мемлекетке 7 жыл бойы пайдаланылмаған жер учаскесі қайтарылды. Ол Алматы қаласының Медеу ауданында Назарбаев даңғылы мен Сәтбаев көшесінің қиылысында орналасқан. Аталған территория орталық мемлекеттік мұражай ғимаратының маңында болып табылады, деп хабарлайды Almaty-akshamy.kz Zakon.kz-ке сілтеме жасап.
Бұрын ол жерде әскери госпиталь болған. Жер кадастрының сайтында көрсетілгендей, бұл учаске 20-315-021-540 нөмірі бойынша тіркелген.
Жер телімінің мақсаты: "автопаркинг және халыққа қызмет көрсету объектілері бар көпфункционалды әкімшілік-қонақ үй тұрғын үй кешені үшін".
Бұған дейін Бас әскери прокуратураның баспасөз қызметі жер учаскесінің мемлекетке қайтарылғаны туралы хабарлаған. 2014 жылы нарықтық құны 6 млрд теңгеден асатын, жалпы ауданы 3,8484 гектар болатын жер учаскесі "Достық строй" құрылыс компаниясы" ЖШС меншігіне өткен болатын.
