Алматыда курсанттарды әскери-спорттық ойындарға іріктеу басталды
Іріктеуден өткен курсанттар Қазақстанның Қарулы күштерінің намысын халықаралық аренада қорғайды
ТМД елдерінің жоғары әскери оқу орындарының курсанттары арасында II әскери-спорттық ойындарға іріктеу бойынша шаралары Құрлық әскерлерінің әскери институтында ұйымдастырылды, деп хабарлайды Almaty-akshamy.kz.
Оған Құрлық әскерлері әскери институтының, Радиоэлектроника және байланыс әскери-инженерлік институтының, ҰҚК Шекара қызметі академиясының 120 курсанты қатысады.
Курсанттарға арнап Қорғаныс министрлігі Спорт комитетінің төрағасы Сиднейде өткен Олимпиада чемпионы Ольга Шишигина, жоғары әскери оқу орындарының басшылары сөз сөйледі.
– Іріктеу жарыстары еліміздің Қарулы Күштерінің құрама командасын қалыптастыруға бағытталған. Іріктеуде жүгіру, белтемірге тартылу, армиялық қоян-қолтық ұрыс, әскерилендірілген кросс, шағын футбол және штаттық қарудан ату бойынша жарыстардың нәтижелеріне байланысты болады, – деді Қорғаныс министрлігі Орталық спорт клубының спорттық іс-шараларды ұйымдастыру бөлімінің бастығы, майор Ербол Игисинов.
Іріктеуден өткен курсанттар Қазақстанның Қарулы Күштерінің намысын халықаралық аренада қорғауға мүмкіндік алады. ТМД елдерінің жоғары әскери оқу орындарының курсанттары арасындағы II әскери-спорттық ойындар 2023 жылғы 5-9 маусым аралығында Өзбекстан астанасы Ташкентте өтетінін айта кеткен жөн.
