Алматыда көшедегі адамдарды пышақпен қорқытып, тонауды әдет қылған топ ұсталды
Қалада пышақпен қаруланған жастар тобы өтіп бара жатқан адамдарды тонаған.
Медеу ауданының полиция қызметкерлері сериялық тонау дерегін анықтады, деп хабарлайды Almaty-akshamy.kz Polisia.kz-ке сілтеме жасап.
"ҚР ҚІЖК-нің 128-бабына сәйкес, ҚР ҚК-нің 192-бабы 2-бөлігінің 1,4-тармағында көзделген тонау, яғни ұрлық мақсатында бөтеннің мүлкіне күш қолдану арқылы адамдар тобының сөз байласуы бойынша қару қолданумен жасалған ұрлық, қылмыстық құқықбұзушылықты жасады деген күдік бойынша 17 жастағы Д., Ж., Н. және 19 жастағы Б. есімді азаматтар ұсталды. Олар заңсыз баю мақсатында пышақпен қорқытып, өтіп бара жатқан адамдарды ұрып-соғып, ұялы телефондары мен басқа да мүліктерін тартып алған. Бір қызығы, бұл “квартет” саябақтар мен халық көп жиналатын жерлерде жүрген. Олар қорғансыз азаматтарға түнгі уақытта ғана шабуыл жасаған. Аталған адамдар ұсталып, қарақшылық шабуыл жасағандарын мойындады", – деді Медеу аудандық полиция басқармасының бастығы Дәурен Өтебаев.
Қазіргі уақытта ұсталғандардың жалпы Алматы қаласы бойынша осыған ұқсас, бұрын жасалған қылмыстарға қатысы бар-жоғы тексерілуде. Ал аталған күдіктілердің қылмыстық әрекеттерінен зардап шеккен азаматтарды тәртіп сақшылары Медеу аудандық ПБ-ға келесі телефон нөмірлері арқылы хабарласуды сұрайды: 8 (727) 254-48-02; 8-702-476-66-60.
