Алматыда ғылымды дамытудың өзекті мәселелері талқыланды
Ғалымдардың жалақысы екі есеге артты
Алматыдағы «Ғылым ордасында» Мемлекет басшысының ғылымды дамыту саласындағы тапсырмаларын талқылауға арналған ҚР Ғылым және жоғары білім министрлігінің кеңесі өтті, деп хабарлайды Almaty-akshamy.kz.
Оған ҚР Премьер-Министрінің орынбасары – Сауда және интеграция министрі Серік Жұманғарин, ҚР Ғылым және жоғары білім министрі Саясат Нұрбек, академиктер мен ғалымдар, сондай-ақ ғылыми қоғам өкілдері қатысты.
Саясат Нұрбек басқосуда Мемлекет басшысының тапсырмасын іске асыру барысын баяндады.
«Ғалымдардың жалақысы екі есеге артты (252 мың теңгеге дейін). Президенттің тапсырмасы бойынша іргелі зерттеулермен айналысатын ҒЗИ-ға тікелей қаржыландыру енгізілді. Министрлік 2023-2025 жылдарға арналған гранттық қаржыландыруға үш байқау жариялады. Бұдан былай гранттық және мақсатты қаржыландыру конкурстары бұрынғыдай үш жылда бір рет емес, жыл сайын өткізілетін болады», - деді министр.