Алматыда бір тәулікте 12 471 адам коронавирусқа қарсы вакцина салдырды
Қаламызда бүгінге дейін екпе салдырғандардың саны 628 132 адамға жетті.
Алматы қаласында бір тәулікте 12 471 адам коронавирусқа қарсы вакцина салдырды, деп хабарлайды Almaty-akshamy.kz қалалық қоғамдық денсаулық сақтау басқармасына сілтеме жасап.
«14 шілде күні 12 471 алматылық вакцина салдырды. Биылғы жылдың 1 ақпаны мен 14 шілдесі аралығында қалада барлығы 628 132 адам вакцина салдырды. Вакцина алғандардың жалпы санынан 60 жастан асқан қарт кісілердің үлесі - 92 352», - деп хабарлады басқармада.
Қалалық қоғамдық денсаулық сақтау басқармасының мәліметінше, қалада 212 вакциналау пункті жұмыс істеп тұр. 1 260 адамнан тұратын 308 егу бригадасы бар. Сонымен қатар, 40 көшпелі мобильді бригада ұйымдастырылған. Қазір медициналық ұйымдарда, мектептерде, мәдениет, спорт объектілерінде, базарлар мен қаланың СОСО-да вакциналау пункттері жұмыс істейді.