Алматыда Балалар үйінің тәрбиеленушілеріне спорттық құрылғылар мен қысқы киімдер таратылды

Алматыда Балалар үйінің тәрбиеленушілеріне спорттық құрылғылар мен қысқы киімдер таратылды
Сурет: Almaty-akshamy.kz

Ержан Бабақұмаров балалар үйінің тәрбиеленушілеріне спорттық құрылғылар мен қысқы киімдер жиынтығын табыс етті.

Алматыда ҚР Тәуелсіздігінің 30 жылдығы аясында «Жанұя» балалар үйінің тәрбиеленушілеріне сыйлықтар тапсыру рәсімі өтті, олар қала әкімдігімен бірлескен жоба аясында «Sagadat batyr-QTT» спорт клубында джиу-джитсумен тегін айналысады, деп хабарлайды Almaty-akshamy.kz

Аталған шараға Алматы қаласы әкімінің орынбасары Ержан Бабақұмаров, Іле ауданы қоғамдық кеңесінің төрағасы және «Sagadat batyr – QTT» клубының құрметті президенті Ерболат Тұрымбетов, сондай-ақ джиу-джитсу және грэпплинг бойынша әлем чемпионаттарының жеңімпаздары мен жүлдегерлері, клубтың жаттықтырушылары мен тәрбиеленушілері қатысты.

Алматы әкімдігінің қолдауымен спорт клубы «Жанұя» балалар үйінің тәрбиеленушілерін джиу-джитсудан және грэпплингтен тегін жаттықтырады. Негізгі міндет – денешынықтыру мен спортты дамыту, балалардың денсаулығын нығайту. Балалар үйінің тәрбиеленушілері екі ай бұрын жаттыға бастады, ал олардың кейбіреулері жаңадан келгендер арасында турнирдің жүлдегері атанды.

Ержан Бабақұмаров балалардың спортқа деген қызығушылығын оң бағалап, жарыстарда сәттілік тіледі. «Жанұя» балалар үйінің 20-дан астам тәрбиеленушілері джиу-джитсу сабағына арналған кимоно мен жылы киімдердің толық жиынтығын сыйлыққа алды.

«Клубта 200-ден астам спортшы жаттығады. Клуб жанынан «Бақытты болашақ» қоғамдық қорын аштық, оның аясында халықтың әлеуметтік осал топтарынан шыққан балалар үшін тегін сабақтар, қайырымдылық акцияларын өткіземіз. Алматы қаласы әкімдігінің қолдауымен және меценаттардың арқасында бүгін «Жанұя» балалар үйінің 20 баласына қысқы сырт киім мен кимоно сыйлаймыз. Біздің мақсатымыз тәрбиеленушілерімізді әлем чемпиондарына айналдыру», - деп атап өтті аралас жекпе-жек палуаны, «Sagadat Batyr» клубының бас бапкері Нұрсұлтан Орынбасаров.

Айта кетерлігі, Алматыда халықты спортпен қамтуды кеңейту бойынша кешенді жұмыстар кеңінен жүргізілуде.

Бүгінде 4 жастан 17 жасқа дейінгі 243 мыңнан астам бала спортпен шұғылданады. Мегаполисте түрлі меншік түрінде 3400 нысан жұмыс істейді. Бос уақытта спортпен айналысуға болатын 100 тынығу орталығы жұмыс істейді, онда 8 мыңнан астам адамды қамтитын 36 спорт секциялары мен үйірмелері тегін әрі қолжетімді. Балаларды тегін спорт секцияларымен қамтуды кеңейту мақсатында жан басына қаржыландыру тетігі белсенді қолданылады.

Мемлекеттік спорттық тапсырыс бойынша 4 жастан 18 жасқа дейінгі балаларға арналған тегін секцияларда спорттың 71 түрі жүзеге асырылады. Мамандандырылған әлеуметтік мекемелерде спортпен айналысуға жағдай жасау үшін жұмыстар жүруде.