Алматы облысында азаптау фактісі бойынша 37 қылмыстық іс қозғалды
Алматы облысы бойынша сыбайлас жемқорлыққа қарсы қызметі азаптау фактісімен 37 қылмыстық істі тергеуде, деп хабарлайды Almaty-akshamy.kz ҚазАқпаратқа сілтеме жасап
«Оның ішінде сыбайлас жемқорлыққа қарсы қызметі 27 істі, ПД өзіндік қауіпсіздік басқармасы 6 істі, прокуратура органдары 4 істі тіркеген», - деді Алматы облыстық сыбайлас жемқорлықпен күрес департаменті басшысының орынбасары Дулат Мадияров.
Ведомство өкілінің айтуынша, қаңтар оқиғалары бойынша тергеліп жатқан қылмыстық істерді тіркеуге негіз болып құқық қорғау органдары қызметкерлері қылмысты мойындату үшiн жәбірленушілерді азаптаған деген арыздар мен шағымдар табылған.
«Полиция қызметкерлерінің іс-әрекеттеріне қатысты арызбен жәбірленушілердің қорғаушылары, туыстары, ата-аналары және өздері де сыбайлас жемқорлыққа қарсы қызметіне жүгінген. Сонымен қатар, бұқаралық ақпарат құралдарына күнделікті талдау жасалып, қажетті тергеу амалдары жүргізілуде», - деді Дулат Мадияров.
Қазіргі таңда, істің жан-жақтылығын қамту мақсатында күнделікті қарқынды бірқатар тергеу әрекеттері жүргізілуде.
Атап айтқанда, барлық арызданушылар жәбірленуші ретінде танылып, олардан азаптаудың қалай және қай жерде болғандығы туралы жауап алынды, тану және беттестіру әрекеттері, олармен оқиға болған жерге барып мән-жайдың қалай болғандығы туралы тергеу әрекеттері жүргізілуде, жарақаттардың ауырлық санатын анықтау үшін тиісті медицина саласының қызметкерлерінің қатысуымен сот-медициналық сараптамалар тағайындалды.
Әр жазған арыз бойынша бөлек қылмыстық істер тіркеліп, жәбірленушілердің өкілдерімен жеке-дара жұмыстар атқарылып жатыр. Әр қылмыстық іс бойынша процестік прокурорлар тағайындалды.
Барлық қылмыстық істер Сыбайлас жемқорлыққа қарсы қызметі агенттігі мен прокуратура органдарының қатаң бақылауында тұр.
«Өз тарапымнан және сыбайлас жемқорлыққа қарсы қызметі атынан әр іс бойынша кінәлі тұлғаларды анықтауға және жауапкершілікке тартуға бағытталған әрекеттерді жалғастыратындығымызды мәлімдеймін. Басқа ақпарат тергеудің құпиялылығын сақтау мақсатында жариялауға жатпайды», - деп толықтырды Алматы облыстық сыбайлас жемқорлықпен күрес департаменті басшысының орынбасары Дулат Мадияров.
