Алматы мәслихатының депутаты Арманжан Байтасов қалалықтарды вакциналануға шақырады
Арманжан Байтасов алматылықтарды вакциналануға шақырады: «Вируспен соғыс жүріп жатыр, бізде қару бар – бұл вакцина»
Алматы эпидемиологиялық ахуал бойынша «қою қызыл» аймақта тұр. Өткен тәулікте мегаполисте коронавирустық инфекцияға ПТР оң нәтиже берген 1 555 пациент анықталды, деп хабарлайды Almaty-akshamy.kz.
Инфекцияның таралуын азайту мақсатында тұрғындарды тегін вакциналау жалғасуда. Қалада медициналық ұйымдарда, мектептерде, мәдениет және спорт объектілерінде, базарларда және қаланың СОСО-да 160 екпе пункті бар (250-ге дейін ұлғайту мүмкіндігімен). Сондай-ақ, 1 028 адамнан тұратын 237 вакцинация бригадасы жұмылдырылған.
Nur Otan партиясынан Алматы мәслихатының депутаты Арманжан Байтасов алматылықтарды вакциналануға шақырады.
«Мен вакцинаны бұрын алғанмын. Вакцина кез келген аурудан немесе вирустан қорғанудың ең тиімді әдісі деп ойлаймын. Вакцина жасау – бұл жеке жауапкершілік мәселесі, себебі егер сіз вакциналанған болсаңыз, сізде қорғаныш бар: ауырмайсыз және ең бастысы, басқа адамдарға қауіп төндірмейсіз», - деді Арманжан Байтасов.
А. Байтасов инфекциялық госпитальде көргендерімен де бөлісті.
«Мен ауруханада болдым, оттегі жетіспейтін, дем ала алмай жатқан адамдардың қалай өздерін нашар сезінетінін көрдім. Бұл жағдайға қараудың өзі ауыр. Сондықтан қазір вируспен соғыс жүріп жатқандығын және бізде вакцина деген қарудың барын түсіну керек. Вакцина өзіңді, отбасыңды, достарыңды қорғайды», - деді ол.
Айта кетерлігі,қазіргі уақытта Алматыда эпидемиологиялық ахуал ушығып тұр. Эпидемиологтардың мәліметінше, ең жоғары жұқтыру бұрынғыдай 20-39 жас аралығындағы тұрғындар арасында тіркелген – 35,6%
