Алматы қаласын дамытуға жыл басынан бері 135,6 млрд теңге инвестиция тартылды
Инвестициялар әлеуметтік салаға, оның ішінде, денсаулық сақтауды, білім беруді және жаппай спортты дамытуға белсенді түрде тартылуда
Алматы қаласының негізгі капиталына үстіміздегі жылдың қаңтар-ақпан айларында 135,6 млрд. теңге инвестиция тартылды. Оның ішінде 117,5 млрд. теңге - ішкі, 18,1 млрд. теңге - сыртқы инвестициялар. Бұл туралы Алматы қаласының кәсіпкерлік және инвестициялар басқармасынан мәлім етті, деп хабарлайды Almaty-akshamy.kz ҚазАқпаратқа сілтеме жасап.
Инвестициялар үш көзден: инвесторлардың жеке қаражаттарынан – 95,6 млрд. теңге (70,5%), қарыз қаражаттарынан – 22,8 млрд. теңге (16,8%), мемлекеттік бюджеттен – 17,1 млн. теңге (12,7%) тартылды.
Инвестицияның айтарлықтай көлемі жылжымайтын мүлікке – 73,3 млрд. теңге (үлесі – 59,8%), көтерме және бөлшек саудаға – 11,2 млрд. теңге (үлесі – 8,1%), өнеркәсіпке – 12,8 млрд. теңге (үлесі – 8,9%) тартылды.
Қазіргі уақытта, инвестициялар әлеуметтік салаға, оның ішінде, денсаулық сақтауды, білім беруді және жаппай спортты дамытуға белсенді түрде тартылуда. Атап айтқанда, «Бизнестің жол картасы-2025» мемлекеттік бағдарламасы бойынша Медеу ауданындағы жеке медициналық орталығы құрылысының пайыздық мөлшерлемесін субсидиялау қолдау тапты. Жобаға 3 млрд. теңгеден астам инвестиция салынды, емхананың ашылуы 2022 жылғы сәуірге жоспарланып отыр.