Алматы әкімдігі қаңтар оқиғалары кезінде бүлінген автокөлік иелеріне 567 млн теңге төледі
Мемлекет басшысы Қасым-Жомарт Тоқаевтың тапсырмасы бойынша шағын және орта бизнеске келтірілген залалды өтеу бойынша ғана емес, сондай-ақ қаңтар оқиғалары барысында автокөліктері бүлінген немесе жойылған Алматы қаласының тұрғындарына да қатысты жұмыс жүргізілуде.
Қазіргі уақытта Алматы қаласы аудандарының әкімдіктеріне автокөлік иелерінен келтірілген залалды өтеу туралы 143 өтінім келіп түсті, деп хабарлайды Almaty-akshamy.kz.
Жеке тұлғаларға келтірілген залалды өтеу тетігіне сәйкес (Үкіметтің 2013 жылғы 28 тамыздағы № 877 қаулысымен бекітілген Терроризм актісі нәтижесінде жеке және заңды тұлғаларға келтірілген мүліктік зиянды өтеу ережелеріне сәйкес), барлығы 143 өтінімге жалпы сомасы 566,7 млн теңгеге қолдау көрсетілді.
Өтініштерді аудан әкімдіктері келіп түскен күннен бастап 1 ай ішінде қарайды. Мүлікке келтірілген залалды бағалау өтініш тіркелген күннен бастап 7 күн мерзімде белгіленеді және оны зардап шеккендер таңдаған тәуелсіз сарапшылар жүргізеді. Шығыстар бойынша бағалауды жүргізу мемлекеттік органдар атынан аудан әкімдіктеріне жүктелген.
