«Оператор РОП» ЖШС директорының өлі денесі табылды
Тергеу амалдары жүріп жатыр.
«Оператор РОП» атты жауапкершілігі шектеулі серіктестіктің басқарушы директоры Руслан Шәмшиев өз-өзіне қол жұмсаған, деп хабарлайды Almaty-akshamy.kz Informburo.kz сайтына сілтеме жасап.
Оның қайтыс болғаны туралы ақпарат алғашында әлеуметтік желілерде пайда болған. Соңынан Нұр-Сұлтан қалалық полиция департаментінде Informburo.kz сайтының редакциясы бұл деректі растаған.
«Ер адамның мәйітін табу фактісі бойынша Есіл ауданының полиция бөлімі ҚР Қылмыстық кодексінің 105-бабы «Өзін-өзі өлтіруге итермелеу» бойынша қылмыстық іс қозғады. Қазіргі уақытта тергеудің толықтығы мен объективтілігін қамтамасыз ету мақсатында қажетті тергеу амалдары жүргізіліп жатыр», - деді полициядағылар.
Руслан Шәмшиев «Оператор РОП» ЖШС-нің құқықтық мәселелер жөніндегі басқарушы директоры болып 2021 жылы келген. Бұған дейін ол «Азаматтарға арналған үкімет» мемлекеттік корпорациясында түрлі қызметтерде істеген.
