Алдағы уақытта отандық телеарналар арқылы 11 тарихи сериал көрерменге ұсынылады
Жыл соңына дейін 4 телеарна арқылы 11 тарихи сериал көременге жол тартады
Бұл туралы ҚР Ақпарат және қоғамдық даму министрі Аида Балева Kazmedia орталығында өткен тарихи сериалдардың таныстырылымында айтты, деп хабарлайды Almaty-akshamy.kz ҚазАқпаратқа сілтеме жасап.
«Түсіріліп жатқан сериалдарға тағдыры арқау болған тұлғалардың бәрінің де арманы - елді тәуелсіздікке жеткізу еді. Осы жолда бастарын бәйгеге тікті. Сондықтан ұлт мақтаныштарының өнегелі өмір жолын көрсету арқылы біз жас ұрпақтың рухын көтеріп, тәуелсіздігіміздің құнын ұғындыра аламыз», - деді ведомство басшысы.
Сондай-ақ, ол мемлекеттік телеарналар ұсынатын контенттің 30 пайызы тарих тақырыбына арналып отырғанын мәлім етті.
«Бүгінде тарихи жобалар мемлекеттік телеарналар ұсынатын өнімнің 30 пайызын құрайды. Жыл соңына дейін тарихи бағыттағы 11 сериал көрермен назарына ұсынылады. Атап айтсақ, «Домалақ ана», «Жәңгір хан. Сарай сыры», «Домалақ ана», «Қаныш. Қазына», «Тәшенев. Тайталас», «Ахмет. Ұлт ұстазы» хикаялары, «Хабар» арнасында «Бұлбұл әнші Роза Бағланова», «Жамбыл Жабаев», «Тұрар Рысқұлов» сериалдары көрсетіледі. Бұлардың бәрі көрермен көңілінен шығып, жоғары баға алады деп сенемін. Бұл туындылардың таныстырылымын жылдағыдай жабық форматта да өткізуге болатын еді. Десе де, тарихи сериалдардың маңызын ескере отырып, арнайы шара ұйымдастырдық», - деп түйіндеді Аида Балаева.
