Алдағы күндері Алматыда жаңа мектеп ашылады
850 орындық мектеп іске қосылады.
Алматының Алмалы ауданында алдағы күндері жаңа мектеп ашылады. Бұл туралы қала әкімі Ерболат Досаев аудан халқымен кездесу барысында айтты, деп хабарлайды Almaty-akshamy.kz.
«Орта білім беру саласында оқушы орындарының тапшылығын азайту және білім беру объектілерін жөндеу бойынша жоспарлы жұмыс жүргізілуде.Биылғы жылдың басында 2 мектептің (№34 және 144 гимназиялар) 850 орындық 2 қосымша құрылысы пайдалануға берілді. Енді 10-шы қарашада Қабанбай батыр көшесінде 850 орындық «Prometheus school» жеке меншік мектебі ашылады», - деді қала басшысы.
Әкімнің айтуынша, № 15-ші гимназияны сейсмикалық күшейте отырып, күрделі жөндеу жұмыстары жүргізілуде, 2023 жылдың шілде айында пайдалануға беріледі.Келесі жылдың III-ші тоқсанының басында №136 және 58-ші мектептің ғимараттарын күрделі жөндеуден өткізіп, сейсмикалық күшейту үшін жобалау-сметалық құжаттама әзірленетін болады.
«Балаларды мектепке дейінгі біліммен барынша қамту үшін биыл Алмалы ауданы бойынша 225 орындық 5 жеке меншік балабақша ашылды. № 7 балабақшаны сейсмикалық күшейту жұмыстары аяқталды. Жобалық қуатты 75 орынға ұлғайта отырып, №43 балабақша ғимаратының бұрын жеке меншікте болған бөлігі сатып алынды. 2023 жылдың II-ші тоқсанында күрделі жөндеу бойынша жобалау-сметалық құжаттама әзірлеуді бастау жоспарланған. Сонымен қатар, осы жылдың соңына дейін Мәуленов- Әйтеке би көшелерінің қиылысында бұрын жалға берілген балабақша ғимаратын күрделі жөндеуден өткізіп, сейсмикалық күшейту үшін жобалау-сметалық құжаттама әзірленеді, 2023 жылдың 3-ші тоқсанында құрылыс-монтаждау жұмыстары жүргізіледі (жобалау-сметалық құжаттаманың сараптамасы 2023 жылдың сәуір айында шығады)»,- дейді Ерболат Досаев.