Әлемде маймыл шешегін жұқтырушылар саны 20%-ға артты – ДСҰ

Әлемде маймыл шешегін жұқтырушылар саны 20%-ға артты – ДСҰ
Сурет: Egemen.kz

Вакциналарға сұраныс жоғары

Сәрсенбі күні Дүниежүзілік денсаулық сақтау ұйымының бас директоры Тедрос Адхан Гебрейюс әлемдегі маймыл шешегі ауруына қатысты баспасөз мәслихатын өткізді, деп хабарлайды Almaty-akshamy.kz ҚазАқпаратқа сілтеме жасап. 

ДСҰ басшысы қазіргі уақытта ұйымға 92 ел мен аумақтан маймыл шешегін жұқтырудың 35 мыңнан астам жағдайы туралы хабарлама түскенін, бұл ретте 12 адам көз жұмғанын атап өтті.

Өткен аптада 7 мың 500-ге жуық жағдай тіркелді, бұл алдыңғы аптаға қарағанда 20%-ға көп.

«Вакциналар өршіген аурумен күресте маңызды рөл атқара алады және көптеген елдерде зардап шеккен қауымдастықтар арасында вакциналарға сұраныс жоғары», - деді ДДҰ басшысы.

Алайда, қазіргі уақытта вакциналардың қоры мен олардың тиімділігі туралы мәліметтер шектеулі. ДДҰ вакцина өндірушілермен, сондай-ақ екпелерін бөлісуге дайын елдермен және ұйымдармен тығыз байланыста.

Өткен аптада хабарлағанымыздай, ДДҰ шақырған сарапшылар кеңесі маймыл шешегі вирусының екі тобының атын рим цифрларымен өзгерту туралы шешім қабылдады.

Бұрын Конго өзені бассейнінің ауруы деп аталатын індеттің нұсқасы енді «бірінші топ немесе I» деп аталады. Батыс Африканың әртүрлілігі «екінші топ немесе II» деп аталады.

«Ауру мен вирустың атын өзгерту жұмыстары жалғасуда», - деп атап өтті ДДҰ басшысы.