Алматы әкімі алматылық марқұм әйелдің отбасымен кездесті
Лаңкестердің оғынан алған жарақатынан 35 жастағы әйел көз жұмды.
Бақытжан Сағынтаев шын жүректен көңіл айтып, көп балалы отбасына тұрғын үй бөлу мәселесін бақылауға алды, деп хабарлайды Almaty-akshamy.kz
5 қаңтар күні кешке Жанар Өтегенова қаладағы келеңсіз жағдайға қарамастан, көшеге шығуға мәжбүр болған. Өйткені оның жаңа туған сәбиіне шұғыл түрде дәрі-дәрмек керек еді.
Жанардың жұбайы Нұрсұлтан Бүркітбаев 2014, 2017, 2019 және 2021 жылдары туылған төрт баласымен қалды.
Ерлі-зайыптылар балаларымен жалға алынған уақытша баспанада тұрды.
Бүгін қала әкімі Бақытжан Сағынтаев Нұрсұлтан Бүркітбаевпен кездесіп, оның зайыбының қайтыс болуына байланысты көңіл айтты. Сондай-ақ, оның тұрғын үй жағдайын жақсартуға көмек көрсету туралы өтінішін жеке бақылауына алды.