2023 жылы Қазақстанда экономика өсімі 4,2 пайыз болуы ықтимал

2023 жылы Қазақстанда экономика өсімі 4,2 пайыз болуы ықтимал
Сурет: Kapital.kz

Биылғы өсім 2,8 пайыз болуы мүмкін. 

Еуразиялық даму банкі 2023 жылға арналған макроэкономикалық болжам мәліметтерін таныстырды, деп хабарлайды Almaty-akshamy.kz ҚазАқпаратқа сілтеме жасап. 

«Қазақстан экономикасы 2022 жылы ішкі және сыртқы жағдайларға төзімділік танытты. Бұған салық және бюджет саясаты бағытындағы іс-шалалар ықпал етті. Біздің бағалауымызға қарағанда, биылғы өсім 2,8 пайыз болуы мүмкін. Қазіргі ахуалды ескерсек, бұл көрсеткіш айтарлықтай жақсы деңгейде. Базалық жағдайда 2023 жылы экономика өсімі 4,2 пайызға дейін қарқын алады деп есептейміз», - деді Аналитикалық жұмыс дирекциясының елдер бойынша талдау жүргізу орталығының аға талдаушысы Айгүл Бердіғұлова онлайн таныстырылым кезінде. 

Оның айтуынша, Еуразиялық даму банкі Қазақстанда салық әрі бюджет саясаты тұрғысында қолдау жасау қадамдары жалғасады деп санайды. Өңдеу өнеркәсібінде, құрылыс секторында және қызмет көрсету саласында, оның ішінде 10 ұлттық жобаны ілгерілету әсерінен өнім көлемі өседі. Келесі жылдағы өсімнің негізгі драйвері Теңіз кен орнында жаңа қуаттарды іске қосуға қатысты болып отыр. Сонымен қатар Каспий құбыр консорциумы толық режимде жұмыс істейді. 

Айгүл Бердіғұлованың сөзіне қарағанда, 2024 жылы Қазақстан экономикасының өсімі де біртіндеп артып, өсу қарқыны 4,4 пайызды құрауы мүмкін.

Бұдан бұрын хабарланғандай, 2023 жылы бір АҚШ доллары 486 теңге шамасында болуы ықтмал.