«Қызыл» болсаң, құрбан шала алмайсың

«Қызыл» болсаң, құрбан шала алмайсың
Сурет: Gov.kz

Оған қоса, «сары» мәртебесі бар азаматтар да құрбандық шалу орындарына кіргізілмейді.

Биыл құрбандық шалатын арнайы орындарда ASHYQ мобильді қосымшасы іске қосылады, деп хабарлайды Almaty-akshamy.kz.

Бұл туралы хабарлаған ҚМДБ төрағасының орынбасары, наиб мүфти Ершат Оңғардың айтуынша, ең басты талап – малдың  шариғат талаптарына сәйкес бауыздап, сойылуын қатаң қадағалау.

«Сары» және «жасыл» аймақтағы құрбандық шалатын арнайы орындарда азаматтардың денсаулығына ерекше көңіл бөлу және қоғамдық қауіпсіздікті қамтамасыз ету мақсатында Аshyq мобильді қосымшасы іске қосылады. Атап айтқанда, «қызыл» және «сары» мәртебесі бар азаматтар құрбандық шалу орындарына жіберілмейді, «көк», «жасыл» мәртебесі бар азаматтар ғана жіберіледі», - деді Ершат Оңғар.

Осы ретте, Нұр-Сұлтан, Алматы және Шымкент қалалары, облыстардың әкімдіктері Ішкі істер, денсаулық сақтау министрліктері, ҚМДБ-мен бірлесіп, еліміздің өңірлерінде Аshyq мобильді қосымшасы аясында қоғамдық қауіпсіздікті қамтамасыз етеді.

«Қасапханаға маска тағып, арақашықтық сақтап, дене қызуы бар адамдардың жақындауына жол бермеуге тиіспіз. Жасы 65-тен асқан қариялар, әйелдер мен балалардың барынша құрбан малын шалатын орындарға баруын шектеуге шақырамыз. Қазіргі уақытта қасапханаға қойылатын тәртіп жоғары. Оны ұдайы бақылап, келушілермен арадағы байланысқа жіті мән беруіміз керек. Ең бастысы, малдың шариғат талаптарына сәйкес бауыздап, сойылуын қатаң қадағалау қажет», - деді Ершат Оңғар.

Айта кетейік, 2021 жылы құрбан шалу рәсімі екі жолмен жүзеге асырылады. «Сары» және «жасыл» аймақтарда онлайн және офлайн форматта өтсе, «қызыл» аймақтарда пандемия жағдайында шариғаттағы «өкілдік» қағидасына сәйкес, qurban2021.kz сайты арқылы тек онлайн режимде құрбан шалынады.