Қазақстанға бірқатар елден өнімдер кіргізілмейді
2021 жылғы 1-8 қазан аралығында Агроөнеркәсіптік кешендегі мемлекеттік инспекция комитетінің аумақтық инспекциялары Қазақстан аумағына Ресейден, Қырғызстаннан, Польшадан, Литвадан және Ираннан фитосанитариялық қаупі жоғары карантинге жатқызылған өнімді заңсыз әкелудің 86 әрекетін тоқтатты, деп хабарлайды almaty-akshamy.kz ҚР Ауыл шаруашылығы министрлігіне сілтеме жасап.
«Карантиндік фитосанитариялық бақылауды жүргізу кезінде Ресей Федерациясынан 803 тонна алма, банан, қызанақ, картоп, қырыққабат, бұрыш, қызылша, сәбіз, бидай, ұн және басқа да өнімдерді фитосанитариялық сертификатсыз әкелуі анықталды. Қырғызстан 2,7 тонна құлпынай, таңқурай, құрма және раушан тамырын фитосанитариялық сертификатсыз әкелгені және олардың маркировкасыз екені белгілі болды. Польшадан 20,3 тонна алма фитосанитариялық сертификатсыз жеткізілген. Литвадан 19,9 тонна кешью жаңғағының карантинге жатқызылған өнімді екінші рет тексеруге ұсынбаған. Ираннан 45,8 тонна алма әкелу кезінде фитосанитариялық талаптарға сәйкес келмеуі анықталды», - делінген ҚР Ауыл шаруашылығы министрлігі мәліметінде.
Нәтижесінде кінәлі адамдар ҚР ӘҚБтК-нің 400-бабы бойынша әкімшілік жауапкершілікке тартылып, оларға 4,2 млн теңге сомасында әкімшілік айыппұл салынды.
«Жыл басынан бері ҚР Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің аумақтық инспекциясы өсімдіктер карантині саласында 5 мыңнан астам заң бұзушылықты анықтап, нәтижесінде 367,2 млн теңге сомасына әкімшілік айыппұл салынды», - деп аталып өткен ведомство хабарламасында.
