Қала күні қарсаңында: Алматы ажарын айшықтаған келісті ғимараттар көп

Биыл оңтүстік астананың Верныйдан Алматы атауына  өзгергеніне 100 жыл толды. 1921 жылы жергілікті орнындағы алманың, оның ішінде сирек кездесетін апорт ағаштарының көптігіне орай Алма-Ата деп өзгертілген еді. Сол себептен болар, қаланы Тянь-Шань жоталарының етегінде орналасқан «бақша-қала» деп атап кеткен. Археологиялық зерттеулерге көз жүгіртсек, қазіргі Алматының орнында ертеректе сақтар, кейінірек үйсін, орта ғасырда дулат тайпалары өмір сүрген. Сол кездердің өзінде-ақ елді мекендер мен қалашықтардың атауы Алмалық пен Алматы қалалары болған деседі. Қаланың атауы жеміс ағашымен байланысуы алманың көптігінен екендігі баршамызға белгілі болар. Бұрындары Алма-Атадан қонаққа келгендерден алманың хош исі аңқып тұратын деседі. Себебі, тұрғындардың барлығы дерлік көшеде мәуесі төгіліп тұрған ағаштардан алманы қалағандарынша жеп, қала берді күтімі жақсы, бұзылмағандарын қысқа арнап бүтіндей сақтап, ал әжелеріміз түрлі тосап түрлерін әзірлегенін айтады. Алматының ең басты сим­волы  атанған алма, оның ішінде Алматының апортының тарихы бірқатар дүние­жүзілік ғалымдар мен зерттеу­шілердің еңбек­теріне арқау болған. Алма бейнесі қаламызды әлемге танытып қана қоймай, шаһардың шырайын аша түсуде. Олай дейтініміз, алма жемісіне байланысты қаламызда салынған ғимараттар, демалыс орындары көптің көңілінен шығып, ерекше әсер қалдыруда.

Алматының маңында, Маловодный ауылының маңында әсем алма бақтары бар. Алмалы баққа келген әрбір адам қаламыздың мәдениеті мен апорт алмасының шығу тарихы, баптау тәсілдері сынды мағлұматтарға қанық бола алады.

Бұдан бөлек, баршамызға таныс «Апорт молл» атанып кеткен сауда орталығы жайында сөз қозғай кетсек. Халықпен етене жұмыс атқарып, тиімді бағадағы тауарлар ұсынып, көңіл көтеретін демалыс орнына, қала берді жалынды жастардың мекеніне айналған.

1967 жылы салынған 8 қабатты «Алма-Ата» қонақ үйі бүгінде көпшілікке «Almaty» атауымен танымал. Сырттан келген қонақтарды заманауи дизайнымен баурап алған ғимарат – қала сәнін арттырып тұрған нысанның бірі.

2005 жылы Көктөбеде бой көтерген алма пішіндес «Тілектер су бұрқағы» қаланың символын бейнелеп қана қоймай, қала қонақтары мен тұрғындары тілек тілейтін киелі мекен іспетті. Мегаполисте бұдан өзге де ерекше ғимараттар мен ойын-сауық орталықтары бар. Біз бүгін солардың ішіндегі ең таңдаулысына тоқталдық.