ЖӘУТІКОВ ОЛИМПИАДАСЫ БАСТАЛДЫ

Қазақ өнерінің қара шаңырағы М.Әуезов атындағы академиялық театрда алғыр балалардың дәстүрлі Жәутіков олимпиадасының ашылу салтанаты болды. Осымен ХІІ рет өткізіліп отырған халықаралық олимпиаданың негізгі ұйымдастырушылары — ҚР Білім және ғылым министрлігі, «Дарын» республикалық ғылыми-тәжірибелік орталығы және «РФМШ» коммерциялық емес АҚ.

Рая ЕСКЕНДІР

Айта кетерлігі, атақты «Физ­Мат» ендігі жерде ком­мерциялық емес акционерлік қоғам болып қайта құрылып, басқарма төр­ағасына Ербол Сейітұлы Баеков тағайын­далып отыр. Осындай жаңалықпен биылғы алғыр балалардың аламанын бас­таған мектеп ұжымы қазақ өнерінің қара­шаңырағына Алматыны көруге асығып келген алғыр балаларды жинады.

Өткен жылғы аламан дода қорытын­дысы бойынша жалпы 182 медальдің 51-ін еліміздің дарынды балалары иеленген еді.

Білім бәсекесінде биікті бағындырған балалардың бар­лығы еліміздегі ең алдыңғы қатарлы оқу ордаларына түсуге мүмкіндік алып, білім грант­тарына ие болды. Атап айтсақ, Назарбаев университеті, ҚБТУ, Халықаралық іТ университеті, ҚазҰУ сынды атақты оқу орын­дарының студенті атанған да­рын­дылардың дені осы Жәу­тіков олимпиада­сында тасы өрге домалағандар.

Сонымен, байқаудың салта­натты ашылуы алдында әдетте­гідей өткен жылғы білім бәсе­кесінен үзінділер көрсетілді. Алатау баурайына жиналған әрбір мем­лекеттен келген қонақ­тар ресми түрде таныстырылды.

«Дарын» республикалық ғы­лыми-тәжіри­белік орталығының басшысы Шол­пан Қира­баева барлық олимпиадаға қатысу­шы­ларды құттықтап, өте жауапты сынақ алдында сәт­тілік тіледі.

– Дәстүрге айналған дода барысында қатысушылардың, яғни, барлық мемлекет­терден келген дарынды балаларға ар­налған мектептердің рейтингін білуге болады. Со­нымен қатар, математика, физика, инфор­матика саласы бойынша оқу­шылардың білім деңгейін бағалап, олардың осы пәндерге деген қызығушылығының артып отыр­ғанын да айта кеткеніміз жөн.

Дәстүрге айналған додаға тек қана дарынды балаларға арналған мектептердің ғана оқушылары қатысады. Бір мемлекетте тұрақты түрде өтіп келе жатқан Халық­аралық олим­пиаданың өтуіне қолдау көрсетіп отырған Алматы қаласы әкіміне, қалалық Білім басқармасына шексіз риза­шылығымды білдіремін. Осынау білім бәсекесі арқылы біз халық­аралық қаты­настарды нығайтып, достықты дәріптеп отырғаны­мызды да айта кеткеніміз орын­ды. Ендігі жерде барлық қатысу­шыларға тек сәттілік тілеймін, – деген Шолпан Ақашқызының сөзінің соңы қонақтарға ар­налған концертке ұласты.

Сонымен, байқау шарты бойынша, физика пәні бойын­ша теориялық және экспери­мен­тальдық кезеңдерден тұрады. Мұнда алдымен қатысушыларға теориялық тапсырма, ал екін­ші кезеңінде бір немесе екі экс­перименталь­дық есеп ұсы­нылады. Сондай-ақ, матема­тика мен информатика пәндері бойынша қатысу­шылар теория­лық есептер шығарады. Халық­аралық олим­пиадаға биылғы жылы әлемнің 17 мемле­кетінен 400 үміткер қатысса, олардың 140-ы біздің дарындылар, олар еліміздің абыройын қорғағалы отыр. Барлығы 58 команда болып бақ сынасатын үміт­керлердің әділ бағасын халық­аралық қазылар алқасы бел­гілейді. Биылғы жылы әділ­қазылар алқасы құрамына 8 мемле­кеттің ғалымдары еніп отыр.