ТҮРКІТІЛДЕС МЕМЛЕКЕТТЕРДІҢ МИНИСТРЛЕРІ БАС ҚОСТЫ

Алматы қаласында Түркітілдес мемлекеттердің ынтымақтастық кеңесінің Ақпараттық-коммуникациялық технологиялар (АКТ) министрлерінің үшінші отырысы өтті. Бұл басқосуды Ақпарат және коммуникациялар министрлігі ұйымдастырды.

 Өтеш ӨТЕУЛІҰЛЫ

Іс-шараға Қазақстан Респуб­ли­касының Ақпарат және ком­муникациялар министрі Дәурен Абаев, Түркітілдес мемлекеттердің ынтымақтастық кеңесінің бас хатшысы Багдад Амреев, Түр­кияның Қатынас және инфра­құрылым министрі Мехмет Турхан, Қырғызстан Респуб­ликасы Ақпараттық технология­лар және байланыс мемлекеттік комитетінің төрағасы Бақыт Шар­шембиев, Әзербайжан Республи­касының Көлік, байланыс пен жоғары технологиялар министрі­нің орынбасары Эльмир Велизаде, сонымен қатар Венгрияның Инфокоммуникация, инновация мен технологиялар министрлігінің мемлекеттік хатшысының орын­басары Кароли Солимар қатысты.

Дәурен Абаевтың айтуынша, Түркі әлемінің интеграциясы, біздің елдер арасындағы өзара әріптестіктің нығаюы – Мемле­кет басшысы Нұрсұлтан Назар­баев­тың сыртқы саясаттағы басым бағыттарының бірі болып отыр. Сондықтан да қазіргі таңда біз заман талабынан қалыс қал­май, ақпараттық-коммуника­циялық технология бағытындағы әріптес­тікті күшейтуге баса назар аудар­ғанымыз жөн.

Сондай-ақ, отырыс барысында министр Әзербайжан мемлеке­тінің «Трансеуразиялық супер­ақпараттық магистраль» құру жөніндегі бастамасына ерекше тоқталды.

– Оның мақсаты – Франк­фурт пен Гонконгтың арасындағы еуразиялық елдердің аумағын қамтитын талшықты-оптикалық трансұлттық желі орнату. Тран­зиттік желі 6 мемлекеттің аумағы­мен өтеді деген жоспар бар. Бұл – болашағы зор жоба, – деді ол.

Дәурен Абаев өз сөзінде өткен жылдан бастап жүзеге асырылып келе жатқан «Цифрлы Қазақ­стан» мемлекеттік бағдарлама­сына шолу жасады. Бағдарлама жоғары технологияларды енгізе отырып, әлеуметтік-экономика­лық сала­ларды жан-жақты қол­дауға, дамы­туға бағытталған.