«ШЕЛЕК ФЕРМЕРЛЕРІ» – ең үздік әлеуметтік жоба

Елбасы Нұрсұлтан Назар­баев Қазақстан халқына Жол­дауында ауыл шаруа­шылығын дамыту перспек­тиваларына ел дамуының ең маңызды 10 тармағының бірі ретінде көңіл бөлді.  Мемле­кет басшысы бүгінгі заман жағ­дайы мен уақыт тала­бына сәйкес, ғылыми база  жетегінде ауыл шаруашы­лығында озық технология­ларды қолдануға уақыт кел­ге­нін ерекше атап өтті.

Бүгінгі уақыт талабы  ауыл шаруа­шылығына ғылым мен жаңа технологияны кіріктіру.  Осы орайда «Филип Моррис Қазақстан»  компаниясы мен  «Еңбекші­қазақ ауданының Жергілікті Қоғамдас­тықтар Қорының» серіктестігі нәтижесінде ұйымдастырылған «Шелек Фермерлері» жобасының нәтижелі жүзеге асқанын айтуға болады. Жоба «Ауылдық аймақ­тарды дамыту» бағдарламасы бағыттары­ның бірі. Қолға алынғанына бес жыл болған жоба  жақында өткен Еуропалық Бизнес Қауымдастығы (EUROBAK) бай­қа­уында  «Жылдың үздік серіктес жобасы» аталымын жеңіп алды.

Жуырда «Еңбекшіқазақ ауданының жергілікті қауымдастықтар қоры»( ЖҚҚ)  бау-бақша маусымының ашылуына орай  БАҚ өкілдерімен ауылдық жерлерді тұрақ­ты дамытудың құпияларымен бөлісті. Баспасөз туры барысында журналистер Шелек ауданындағы көкөніс өсірудің жаңа әдістерімен танысты.

«Шелек Фермерлері» бағдарламасының операторы бола отырып, ЖҚҚ жобаны одан әрі дамытуды жалғастыруда – 4 жыл ішінде қатысушылар саны 4 есеге өскен.

– Әркімнің өз сүйікті ісі бар, мен үшін бұл – көкөніс өсіру. Осының арқасында табыс табамын. «Еңбекшіқазақ ауданының жергілікті қауымдастықтар қоры» ҚҚ фермерлер үшін тек семинар-тренингтер, консультациялар ғана өткізіп қоймай, қар­жылай қолдау да көрсетеді. 2014 жылдан бері қордың түрлі байқауларына қатысып жеңімпаз атандым, тиісінше, көкөніс өсіруге арналған жабдықты сатып алуға мүмкіндік пайда болды. Биыл «Шелек Фермерлері» ауыл шаруашылығы коопера­ти­вінің мүшесі бола отырып, жылыжай құрылысын қаржылан­дыру мүмкіндігіне ие болдым. Мен үшін жылы­жайда көкөніс өсіру – отбасылық бизнесті дамытудың тағы бір жолы, жылыжайдың үйімнің қасында болғаны қуантады, ауа-райы өнімге әсер етпейді, ал биыл салқын әрі жаң­бырлы жаз маусымы. Менікі сынды шағын фермерлік қожалықтар үшін бұл үлкен қолдау, – дейді аудандағы фермер­лердің бірі Ерсінбек Әукенұлы.

Бүгінде аудан фермерлері шағын биз­нестерін сәтті дамытып және көкөністерді өсіруде заманауи технологияларды қолдану мүмкіндіктеріне ие болып отыр. Осы мақсатта ЖҚҚ 2013 жылы ашылған Агро­бизнес орталығында фермерлерге тренинг­тер, семинарлар, консультациялар ұйым­дас­тырылады. Сондай-ақ, басқа аймақтар­дан келген фермерлермен іс-тәжірибе алмасуға арналған кездесулер өткізеді.

– Менің әкем ОҚО-да жергілікті қауымдастықтар қорымен ұйымдасты­рыл­ған таныстыру турынан кейін, үй-жайын­дағы аулада кішігірім жылыжай салу идеясын жүзеге асыруға ниеттенді. Қазір мен әкемнің ісін жалғастырудамын және үшінші жыл қатарынан жылыжайға қыза­нақ өсіріп келемін. Біздің жылыжай­лары­мыздың алғаш­қысы өте қарапайым, қазір­гідей заманауи жабдықпен қамтыл­маған еді. Біз көкөніс­терді өз тәжірибемізге сүйе­ніп өсірдік. Қарапайым пеш пен пленка, жылы­жайдың конструкциясы да қара­пайым болды. Ендігі кезекте қор қызмет­кер­лерінің кеңестері арқа­сында жыл сайын жылыжай­ды кеңей­тіп, оны озық техно­ло­гиялармен толықтыру үстіндемін, сәйке­сінше жоғары өнімділікке қол жеткі­зудемін. Алғашқы көкөністерді әдеттегіден бұрын жинап алғандықтан, олар­ды қым­батырақ сатамын. Мен барлық жетістік­терімді «Ауылдық аймақтарды дамыту» бағдарла­масымен байланысты­рамын және оның арқасында мен ғана емес, ауданы­мыз­дың өзге де фермерлері үйреніп келеді», – дейді жергілікті фермер Роллан  Ибра­гимов.

2014 жылдан бері бағдарламаға қаты­сушы фермерлер көптеген заманауи агро­технологияны кәсіпке енгізу мүмкіндігіне ие болды. Ал жылыжайларда түрлі-түсті бұрыш өсіру аудан фермерлері үшін даму­дың жаңа сатысын ашады. Шелек ауданы­ның дәстүрлі көкөнісі бұрыш – бұрын-соңды жылыжайда өсірілмеген еді, жаңа әдіс жұмыс сапасын жоғары көтереді. Енді фермерлер орақ маусымын шілде айының ортасында, яғни үйреншікті уақыттан бір айға ертерек бастап, қараша айына дейін, яғни 1,5 – 2 айға, создыра алады. 7-8 ай уақытты қамтитын маусым фермерлердің қосымша табысқа қол жеткізуіне жол ашады. Осының арқасында фермер-көкө­нісшілер өз өнімін орта есеппен 20-30 пайызға арттыра алады.

– «Шелек Фермерлері» ЖҚҚ «Ауылдық аймақтарды дамыту» кешенді бағдарлама­сының бір бөлігі болып табылады және біз осы жоба аясында  жаңа ауыл шаруашы­лығы технологияларын эксперименталды аймақ­тарда тестілеуден өткіземіз. Жергілікті фермерлер тамшылатып суару, шпалерде қызанақ өсіру әдістерін үйреніп, топырақ бетін жабындау және өзге де технология­ларды қолдануды игеруде. Біздің фермерлер ерте өнім алу мақсатында жылыжай тұрғы­за бастады. Әдетте, фермерлер жылыжай­ларда қызанақ және қияр өседі. Мен агроном ретінде эксперименталды учаске­лерде жұмыс істеуді жалғастырамын және осы жылы жылыжайда бұрыш өсіруді қолға аламын. Кіріс пен өнімділікті саралап көре­мін. Қазірдің өзінде жақсы әлеуетті көремін, алдағы жылы фермерлерге жылыжайларда бұрыш өсіруді ұсынамын, – дейді агроном Павел Кавунов.

Қазақстандық ірі бизнес өкілдерінің бірі «Филип Моррис Қазақстан»  ЖШС-нің  осынау ауыл шаруашылығын қолдау жоба­сы  Елбасы тапсырмаларын жүзеге асыру­дың үлгісіндей. Елімізде агросала, бизнес және жаңа технология бірлескен жағдайда тәуелсіз мемлекет алға жылжып, халықтың әл-ауқаты түзелмек.