МАЙРАНЫҢ МАХАББАТЫ

Ө.Жолдасбеков атындағы Студенттер сарайында Қазақстанның еңбек сіңірген әртісі Майра Ильясованың шоқтығы биік жобаларының бірі – «Жан анам» қайырымдылық ән кеші болып өтті.

Рая ЕСКЕНДІР

Дәстүрлі ән кешінде қаланың қайы­рымды халқы әсем ән тыңдап қана қоймай, Руслан Қыдырбек есімді жасөс­пірімге көмек қолын созып, үлкен сауапты іс жасады. Өте күрделі 4 диагноз қойылған Русланға жұртшылық 800 мың теңге жинап, көмек көрсетті.

Қазақ сахнасының сандуғашы Майра Ильясова осынау ән жобасының нұсқа­сын жасап отырғанда «Асыл анамның нұр жүзі жадымда еміс-еміс жаңғырып тұр. Мен үш жасқа толар-толмастан о дүниеге аттанып кеткен анамды жиі есіме аламын. Сәбиі болып еркін еркелей де алмаған екенмін-ау. Сол анама перзент­тік парыз ретінде мәңгілікке бір ескерткіш қойсам деп армандаушы едім. Сол арманым ақиқатқа айналған сияқты. Анама, жалпы барлық аналарға деген махаббатым осы ән жобасы болар», – дегені әлі күнге есімде.

Майра Әлімғазықызының сол бір ән жобасы ғұмырлы болды. Тыңдаушысын сұлу әнмен тербеп келе жатқанына биыл тура 10 жыл толды. Көктемнің лебіндей, жылылықтың хабаршысы іспетті «Жан анамды» қалың көрермен сағына тосатын болды. Уақыт өте келе, көрермендер осы­нау ән кешінің тағы да бір жаңа­лығына куә болғаны бар-тын.

Көмекке мұқтаж, төңірегіндегілерден көмек күтіп, жылылыққа зәру жандарды көрген сайын Майра Әлімғазықызының жүрегі елжіреп, көңілі босап, іштен тынып жүретін.

– «Мына жобаны қайырымдылық ән кешіне айналдырсам қайтеді», – деп ой түйген Майра Әлімғазықызы келесі ән кешінде сырқат балаға көмек көрсетіп, үлкен жүректілік танытқаны бар. Қазақ деген – жаны жомарт, қолындағысын біреуге беруге асығып тұратын халық емес пе?! Сол жолы қайырымдылық үшін қойылған жәшікке жан-жақтан ағылған жұртшылық қолындағы тиын-тебенін сырқат баланың сауығып кетуіне көмек болсыншы деп, әп-сәтте-ақ қомақты қар­жы жинап берген еді. Майраның қайрат­керлігі, қайырымдылығына тәнті болған жұртшылық та сауапты іске қолдау білдіріп, «Жан анам» ән кешін қайырым­дылық шарасына айналдырып жіберді. Осы жылдар ішінде қолы үсіп кеткен жас жігіт, бір бүйрегін бауырына берген туыс, төсекке таңылған ғаріп бала дейсіз бе, ұзын-ырғасы 8 мұқтаж жанның өміріне арашашы болған екен. Осынау нұрға толы «Жан анамның» он жылы да сауапқа толы. Естеріңізде болса, қолы үсіп кеткен атпалдай азаматты анасы тамақтандырып, басқа да қажеттіліктерін атқарып отыр­ғанын көрген жұртшы­лықтың еріксіз егіліп, қатты күйзелгені бар. Көрерменнің қайырымдылық көмегі­нің арқасында домбығып кеткен қолдың орнына білікті дәрігерлер саусақ орнатып, кесені қолымен ұстайтындай дәрежеге жеткізген еді. Сол жігіт бүгінде көлік жүргізіп жүйткіп жүр. Естуімізше, үйленіп те алыпты. Міне, «көп түкірсе – көл» деген осы емес пе?

Әнші Майраның әкесі Әлімғазы Ибраев пен анасы Қазына өмірге төртінші перзенттері Майра келгенде «1 Мамыр – мереке күні дүние есігін ашқан бала­мыздың аты Майра болсын» деп есімін ерекше атаған екен.  Қысы суық, көктемі жай келетін Семей топырағында дүниеге келген әнші Майра бүгінде халқының танымал өнер шебер­лерінің біріне ай­налды. Сахна шебері, көмейіне бұлбұл ұя салған сандуғаш үнді әнші Майра бала­лар үйлері мен арнаулы мектеп-интер­наттарында болып, талай-талай мүмкіндігі шектеулі балалардың жанынан табылды.

Алматыдағы Н.Островский атындағы №4 көзі нашар көретін балаларға ар­налған мектеп-интер­натына барып, ән салған Майраның өзін көрмесе де, оның әнін жүрегімен тыңдаған балалар қайта-қайта қошемет көрсетіп, қимастықпен қоштасты. Сол жолы балалардың әнге деген іңкәр жүректеріне риза болған Майра апайлары да музыкалық аппаратты сыйға тартып кеткен еді. Әнді жүрекпен қабылдаған бала­лар қатты риза болып, Майра апайларын ең қайы­рымды жан ретінде қабылдаған еді. Қаламыздағы «Үміт үйінің» кішкентай сәбилері де Майра апай­ларын сағына тосып отырса, Талғарда да әнші апала­рының жолын күтіп отыратын балалар бар. Көмекке мұқтаж жанның барлығы Майра Илья­сованы іздейді. Жерлестері, сыныптастары дейсіз бе, «Майра, сенің көмегің қажет болып тұр» деп жатқаны. Сонау Семейде де Майраның қалдырған қол­таңбасы баршылық. Сәтін салса, туған жері Ақ­суатта мешіт салсам деген де арманы бар.

Әнші Майраның «Қазақтың Май­расы» атануы да тегін емес. Халқымызда әнші көп болғанымен, Майра жалғыз. Халықтың Майраны жақсы көріп, жақын тартуы – оның қарапайым мінезінде. Ел­ден ерекшеленіп, биіктен менсінбей қарау деген Майраға жат мінез. Атақты әнші екенмін деп асқақтап кеткен жері жоқ. Қашанда халқымен бірге жүретін Майра Ильясованы көрген жұрт та тура бір туға­нын көр­гендей қолын алып, құшақ­тап амандасып жатқаны.  Сахна киесін сезін­ген өнер иесі көрерменін де қадір тұта біл­се керек. Біз білетін Майра Ильясо­ваның азаматтығы, қарапайым қазақы мінезі оның өзіне тән үлкен жүректілігін аңғартса керек. Майраның ән кешіне ке­ліп, шығармашылығымен таныс жан­дар жиі аңғарып отыратын тағы бір дәстүр бар.

«Үлкен сарайда ән салғымыз келеді. Жұлдыз­дармен бірге ән салсақ қой» деген талай жас таланттың да өнердегі тұсауын кесіп жүрген әнші Майра кіндік шешелері іспетті.  Өнерде бірге жүрген, көзден кет­кен соң, көңілден де кетіп жатқан әріп­тестері де Майраны бір сәт бей-жай қалдырған емес. Өмірде де, өнерде де бірге жүрген құрбысы Мәдина Ералиеваны еске алуға арналған ән кештерін де ұйымдас­тырып жүрген – осы Майра Ильясова.

Қарапайымдылығымен халқының ықыласына бөленіп жүрген Майра Әлім­ғазықызының өнер жолындағы жылдар­дың өз қиындығы да болды. Атақ-даңқ талмай іздену мен еткен еңбектің арқа­сында келді. Майра әлі де ізденіп, бір сәт бос отырғысы келмейді. Көзінің ағы мен қарасындай болған Тоғжанынан бүгінде екі немере сүйіп отырған қажы Майра Ильясова – отбасында мейірімді әже. Қарап отырсаңыз, сахна сандуғашы Май­ра Ильясова тек әнші ғана емес, іскер ұйымдастырушы, ұстаз, ардақты әже, адал құрбы, жаны жомарт жан. Бұл біз білетін Майраның бір-екі қыры ғана. Ең бастысы, Майраның халқына деген махаббаты.