Мағжан сенген жастар оның өлеңдерін оқыды

Биыл – Мағжан Жұмабаев жылы. Алматы төрінде, Қазақстан­дағы ең алғашқы жекеменшік жоғары оқу орны болып ашылған, ұлттық және халықаралық аккредитациялаудан өткен «Қайнар» академиясында қазақ тілі мен әдебиеті және журналистика мамандықтарының 1-курс студенттерінің белсенділігімен Мағжан Жұмабаевтың 125 жасқа толуына орай әдемі бір әдеби кеш өтті. Оған мұрындық болған осы ака­демияның «Тілдер және журналистика» кафедрасының мең­герушісі, филология ғылымының кандидаты, профессор Гүлнар Мұхаметқалиева мен филология ғылымының канди­даты, мағжантанушы профессор Бақыткамал Қанарбаева.

Нұржамал ӘЛІШЕВА

Жастардың әдеби кешінің шы­мылдығын «Қайнар» академиясының оқу-тәрбие жұмыстары жөніндегі проректоры  С.Әбдібеков құттықтау сөзбен ашып, ал М.Әуезов атындағы Әдебиет және өнер институтының бас ғылыми қызметкері Гүлжаһан Орда жастардың құлағында жүрсін деп Мағжан ақынның қаламгерлігі мен қайраткерлігі туралы әңгімелеп берді.

Әдеби кеште Мағжан Жұмабаев шығармашылығы туралы ең ал­ғашқы болып диссертация қорға­ған қазақ әйелі, ақын өлеңдерін қалай оқыту­дың ғылыми методикасын ең алғаш ұсынған  Бақыткамал Қанар­баева тебірене сөз сөйледі. Тебіре­нетін орны бар, саналы ғұмырының көп бөлігін осы алаш қайраткерін зерттеуге арнап келе жатқан ғалым-әйел осы уақытқа дейінгі еңбегі үшін ешкімнен қалам­ақы да, атақ-дәреже де сұрамаған. Ол небары 44 жыл ғана өмір сүрген Мағ­жан шығар­малары қазақ жас­тары­ның рухын оятатын, оларды елжандылық сезімге тәрбиелейтін күшті құралға айналып жатса, сол марапат деп есептейді.

Б.Қанарбаева әлеуметтік тақы­рып­тан бастап ағартушылық, ұлт-азат­тық, демократияшыл бағытты ұстан­ған ақынның ғылыми мұрасы, жаңа­шылдығы мен шығармашылық эволю­циясы, поэзиясы мен бірқатар өлеңінің тарихы туралы тарқатты. Мағжан­танушы ғалымның сөзіне сүйенсек, ақын ел ішіндегі әлеуметтік мәселе­лерді көтеріп, халқын өнер-білімге шақырып, махаббатты ғана жырлап қоймай, әлемдік поэзияда экология­лық тақырыпты алғаш жырлаушы­лардың бірі. Шет ел қаламгерлерінің әңгімелерін қазақ тіліне аударған. Ал өзінің өлеңдері әлемнің 12 тіліне аударылған екен.

«Ұлт тағдыры, тәуелсіздік, ар үшін құрбан болған арысым!» атты әдеби кеште академияның 1-курс студент­тері Мағжанның «Жүсіпхан» поэма­сынан көрініс қойды. Бұл кеш­те ақынның әндері де орындалды.

Елбасы күні кешегі Жолдауында келесі жылды Жастар жылы деп жариялауды ұсынды. Жастардың барлық санатын қолдауға арналған шараларды толық қамтитын әлеу­меттік сатының ауқымды платфор­масын қалыптастыру керектігін айтты. Гүлнар Мұхаметқалиева мен Бақыт­камал Қанарбаеваның бізге риясыз сүйсініп айтқанындай-ақ бар екен, Мағжан ақынның өлеңдерін оқыған студент қыз-жігіттер шетінен мықты, жанып тұр. «Жер жүзіне…», «Өнер-білім қайтсе табылар», «Мен кім?..» сынды өлеңдерін оқыған жастардың көзінен от, жүректерінен сезім байқалды. Тіпті, Мағжан Жұмабаевқа арнап жазған балғын өлеңдерін оқыған студенттер талабына да еріксіз сүйсіндік. Әдеби кеш соңында акаде­мияның 1-курс студенті Айдар Айып Мағжанға арнаған өлеңі үшін 1-орын­ды, ал Ақтолқын Тұрлығазы ақынның өлеңін мәнерлеп оқығаны үшін 1-орынды иеленді. ҚазҰУ-ден, Орталық Азия университетіне келген студент­тер де марапатсыз қалмады. Біздің елдің абыройын көтеретін осы жастар. Біз оларға сенеміз!