Астанадағы рұқсат етілмеген қоқыс алаңдарына қатысты мәселе қоғамдық резонанс тудырды, деп жазады Alash.kz ұлттық порталы.
Белсенділер «Нұр Астана Құрылыс» компаниясының әрекетсіздігіне қарсы наразылық білдіріп, қоқысты тікелей компания кеңсесіне жеткізді.
Қалалық әкімдіктің ресми мәліметінше, биыл елорда бойынша 5 ауданнан 45 мың тоннаға жуық қоқыс шығарылған. Алайда Ұлы Дала мен Тұран даңғылдарының қиылысындағы 8,6 гектарлық қоқыс алаңы әлі күнге дейін назардан тыс қалып отыр. Спутниктен де көрінетін бұл үйінділер ұзақ уақыт бойы жинақталған.
Аталған аумақ үшін жауапты құрылыс мекемесі – «Нұр Астана Құрылыс» компаниясы.
Экологияны қорғау мен қала тұрғындарының жайлылығы туралы ресми уәделеріне қарамастан, компания нысандарының жанында қоқыс үйінділері жиі кездеседі.
Белсенділер бұл әрекетсіздікке назар аударту мақсатында ерекше қадамға барды: олар қоқыс қалдықтарын компания кеңсесіне велосипедпен жеткізді.
«NAK-тың қоқысы – NAK кеңсесіне. Өз қоқыс алаңдарыңды өздерің тазалаңдар!» деген ұранмен ұйымдастырылған бұл шара қала экологиясы үшін жауапкершілік алудың маңызын көрсетті.
Қоқыс жеткізу кезінде белсенділер мен компанияның басқарушысы Серікжан Мұхтаров арасында диалог өтті.
Оқиға орнына құқық қорғау органдары келіп, мән-жайды анықтады. Дегенмен, «Жаңа адамдар» қозғалысының өкілдері компаниядан нақты жауап ала алды – қоқыс алаңын жою 2025 жылдың қазанына жоспарланып отыр.
Antitrash бастамасының қатысушылары «Нұр Астана Құрылыс» компаниясын өз уәделеріне сай әрекет етіп, экологияға қатысты ұрандардың бос сөз емес, нақты іспен дәлелденуін талап етуде.
