Еліміздегі Өзгерістер үдерістеріне атсалысу – МІНДЕТІМІЗ

Қазақстан Республикасы Президенті Нұрсұлтан Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы тұтас бір дәуірдің ауқымындағы мемлекет атқаратын мақсаттар мен міндеттерді қамтыған. Мемлекет басшысының еліміздің әлеуметтік-экономикалық дамуының өзекті мәселелеріне және қазақстандықтардың әл-ауқатын одан әрі арттыру міндеттеріне арнаған Жолдауында айтылған маңызды міндеттер мен айқын бағыттар еліміздің одан әрі дамуына ерекше серпін берері анық. Маңызды құжатта Елбасы еліміздің даму кезеңдерін және қазіргі уақытта елдің алдында тұрған экономикалық мәселелермен қатар «Әрбір қазақстан­дықтың еліміздегі өзгерістер үдерісте­ріне атсалысуы» атты алтыншы басым­дығында   «Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек. Келесі жылды «Жастар жылы» деп жариялауды ұсынамын» деді.

«Келесі жылы «Педагог мәртебесі туралы» заңды әзірлеп, қабылдау қажет деп санаймын. Бұл құжат мұғалімдер мен мектепке дейінгі мекемелер қыз­мет­керлері үшін барлық игілікті қарас­тырып, жүктемені азайтуға, жөнсіз тексерістер мен міндеттен  тыс функ­циялардан арашалауға тиіс» деді Ұлт көшбасшысы.

Елбасының соңғы жылдардағы Жол­даулардың арқауы болып келе жатқан бір қағидат – экономикалық әлеуетінің адам әлеуетіне тікелей байланысты екендігін жан-жақты талдап, қоғамдағы көкейкесті мәселелерді шешу тетігінің адами капиталға барып тірелетіндігіне барша қазақстандықтарды иландырып, осы бағыттағы асуларды бағындыруға жұмылдыру.

Елбасымыз: «Білім беру ісінде 4К моделіне: креативтілікті, сыни ойлауды, коммуникативтілікті дамытуға және командада жұмыс істей білуге басты назар аударылуда» деді.

Осы орайда Қазақ мемлекеттік қыз­дар педагогикалық университетінің ректоры Гауһар Алдамбергенова өзінің «Ұстаз мәртебесі – ұлт мәртебесі» атты мақаласында атап өткендей, «Білікті, білімді кадрлар даярлауда және техно­логиялық дамыған елдердегі ғылыми жұмыстар жүйесінде жоғары оқу орын­дары үлкен маңызды рөл атқарады.

Бұл тұрғыда Қазақ мемлекеттік қыздар педагогикалық университеті ғылым мен білімді өзара үйлестіріп, ғылыми зерттеу жұмыстарын ғылым мен технологияның жаңа нысандарына бағыттап жүргізуді басты мақсат етіп келе жатқанын атап өткім келеді. Білім мен ғылымды дамыту және қыздарға педагогикалық білім беру, белсенді азаматтық ұстанымы бар мамандар даярлау басты миссиясы болып табыла­тын оқу орнында өткізілетін халықара­лық деңгейдегі ғылыми конференция­лар, жүзеге асып жатқан түрлі жобалар саладағы мәселелерді шетелдік әріптес­термен бірлесе шешіп, тәжірибе алмасу­ға мүмкіндік береді.

Білім беру саласында болып жатқан жетістіктер мен жаңалықтар Қазақстан Республикасының Президенті Н.Ә.На­зар­баевтың жете көңіл аударып, жан-жақты қолдау көрсетуі мен баста­мала­ры арқасында жүзеге асып жатқа­нын ерекше атап айтқан жөн. Тәуел­сіздікті баянды етуде білімнің маңызды­лығын жете түсіну, экономикалық және қар­жылық қиындықтарға қарамастан, осы салаға барынша ыждаһаттылықпен қолдау көрсету – асқан болжампаз­дық­тың белгісі.

Елбасының әр Жолдауы – еліміз үшін де, жеріміз үшін де маңызды. Себебі, нақты міндеттер белгіленіп, мақ­саттар айқындалады. Толайым табысқа қол жеткізу үшін де асқан ауызбіршілік пен тыныштық керек. Бұл тұрғыда еліміз әлемге бейбітсүйгіш қал­пымен де үлгі көрсетіп келеді.

А.САТБЕКОВА,

педагогика ғылымының докторы,

профессор, «ЖОО үздік оқытушысы», Мемлекеттік

гранттың иегері,Қазақстан Педагогикалық Ғылымдар академиясының академигі

Толығырақ

Ұқсас ақпараттар

Добавить комментарий

Ваш e-mail не будет опубликован. Обязательные поля помечены *