Алтын ұяға «Ақылбай» ақсақал келді

Ғасырға жуық тарихы бар, қазақ білімінде аты алтын әріппен жазылып қалған атақты №12 мектептің «бай қоржыны» тағы да бір естен кетпес оқиғамен толықты. Ш.Уәлиханов атындағы №12 мамандандырылған гимназияға қазақ өнерінің мақтанышы, «ақылман-ата, Ақылбай қария» М.Әуезов атындағы академиялық драма театрының әртісі, «Дарын» мемлекеттік сыйлығының иегері Бекжан Тұрыс қонаққа келді.

 Киелі шаңыраққа келген өнер шебері атақты мектептің тұнып тұрған тарихымен танысып шықты. Талай тұлғалармен тарихи сәттің куәсі болған мектептің үлкен мәжіліс залына өтіп, өзін күтіп отырған көрермендерімен кездесуге асықты. Міне, мектептің «Сырлы саз» оркестрі орындаған күй ырғағымен керемет кеш басталып та кетті. Ақын да, әкім де, ұшқыш та, ғалым да талай мәрте төрінен орын алған №12-нің қонақжай шаңырағындағы кештің алғы сөзін, білім саласының білгірі Рахима Сәкенова алды.

– Бүгінгі кездесуіміздің «Жүрегімді адалдыққа шөлдеттім» деп аталуы да тегін емес. Кезінде Алаш зиялылары өздері атқарып жүрген қызметтері арқылы қазақ қоғамының керегесін кеңейтіп, жоғын түгендеп, барын саралаған екен. Бекжан Тұрыс та осы арыстардың жал­ғасы сияқты. Киелі сахнада жүріп қазақ мінезін, болмысын, тағдырын сомдады. Сахнаның пәрмені арқылы бүгінге, болашаққа сөз арнады. Оның бойында өнерімен бірге қайраткерлігі, қиянатқа төзбеушілік, адалдық, ұлтқа қызмет ету жолындағы табандылық, ата-бабадан қалған, ана сүтімен берілген ұлттық қасиет пен мінез бар. Кездесу кешінің кейіпкері үлкен актер ғана емес, қара қылды қақ жаратын, дауға салсаңыз әділдігін айтатын нақ шешеннің өзі. Бекжан Асаубайұлының бүгінгі кездесуін «Ұлым, саған айтам» атты сыр-сұхбатының сахнада айтылмай қалған жалғасы деп қабылдасаңыздар да болады, – деді.

Осынау кездесуді тағатсыздана күтіп жүрген 5-сынып оқушылары Бекжан ағаларымен «Бауырсақ» ертегісін сахналады. Кішкентай әртістер Кәмила Алтаева – қоян, Шерхан Нұрмұханбетов – қасқыр, Мағжан Ерғанат – аю, Әли Ақанғали – түлкі болып, «Бекжан-бауыр­сақты» ортаға алды. «Атамнан да қаштым, апамнан да қаштым, қояннан да қаштым» деп келетін бауырсақтың әніне салған Бекжан ағаларының өнеріне балалар шексіз риза болып, бір серпіліп қалды. Танымал театр әртісімен бірге сахналық қойылым қойып, серіктес болу әркімге бұйыра бермейтін бақыт. Тіпті, жас әртістердің өзі әлі күнге Бекжан Тұрыспен бір қойылымда ойнағанды армандап жүр. Келесі кезекте 1-сыныптықтар ортаға шығып, «Ақылбай атаға» деген арнауларын оқыды.

– Сахнада қария шалдайсыз, жақыннан сізді көрейік, шынында аға қандайсыз  деген тапқыр оқушылардың әзіл өлеңіне Бекжан Тұрыс риза болып, күліп алды.

Театр тарланы бүгінге дейін 60-қа жуық рөлдерді сомдаған екен. Кейіпкерлері де сан алуан тағдыр иелері. Олардың арасында тарихи тұлғадан бастап, комедиялық кейіпкерлер де баршылық. Оқушылар Бекжан Асаубайұлына «Ақылбай ақсақал ретінде жастарға қандай ақыл айтар едің?», «Өмірдегі қызықты, естен кетпейтін бір сәтіңіз?», «Өнер жолындағы алғашқы ұстазыңыз?», «Ұлттық құндылық, ұлттық мінез», «Ар мен намыс», «Әдеп пен иба» сияқты намысты оятатын, салмақты да салиқалы сауалдар қойды. Бекжанның «Ұлым, саған айтамын» ұлы Мағжанға емес, бүкіл қазақ ұлтына бағышталып айтылып жатқанын терең ұғынған зиялы ұл мен қыз үш сағатқа жуық сілтідей тынып, барлық зейіндерімен «Ақылбай ақсақалдың» ақыл-кеңесін тыңдап, барды бағалап, жоқты түгендеу қажеттілігін сезініп, бір сәт есейіп кеткендей күй кешті.

Сахна әлеміндегі алғашқы қадамын Өнер институтының 3-кур­сынан бастаған Бекжан Тұрыс бүгінде кемеліне келген кемеңгердің өзі. Елағаң да, Серағаң да болып шыға келетін Бекжан Тұрыс «қария­лар азайып бара жатқан» заманда Ақылбай ақсақал болып, қоғамға ақыл айтып қояды. Әсіресе, «аталар» азайып, «әжелер» көбейіп кеткен қоғамға бір емес, бірнеше Ақылбай ақсақал керек-ақ.

Толығырақ

Ұқсас ақпараттар

Добавить комментарий

Ваш e-mail не будет опубликован. Обязательные поля помечены *