Алматыда егде адамдарға жүйелі қолдау көрсететін болады

«Ардагерлерді ардақтайық» жобасы аясында «Белсенді ұзақ өмір сүру жол картасы» талқыланды

Нұржамал ТЕГІНБАЙҚЫЗЫ

Алматы қалалық әкімшілігінде қалалық Қоғамдық кеңестің кезекті отырысы өтіп, онда   «Нұр Отан» партиясының «Ардагерлерді ардақ­тайық» жобасы аясында  «Белсенді ұзақ өмір сүру жол кар­тасы» талқыланды. Оған  қала әкімі Бауыржан Байбек,  қоғамдық кеңес мүшелері, қала аудан­да­рындағы Ардагерлер кеңесінің төрағалары, қоғамдық ұйымдар,  қала басқар­маларының басшы­лары,  кәсіпкерлер, Жастар ұйым­дарының   өкілдері қатысты. 

Жиынды қоғамдық кеңестің төрағасы Рахман Алшанов ашып жүргізді. Алматы қаласында бүгінде 222 мыңға жуық зейнеткерлер  тұрады екен. Демек, бұл  қала халқының 12,5 пайызын   (жасында бейнет көріп, бүгінде зейнет жасындағы  ата-апаларымыз) құрайды деген сөз.   Зейнеткерлер мен ардагер­лерімізге қала әкімдігі тарапынан көрсетіліп жатқан қамқорлықтар мен әлеуметтік көмектер аз емес.

Жылына 4 мыңға жуық  арда­гер­лер қала маңындағы шипажайларда дем алып, денсаулық­тарын жақсартса, 17 мың­ға жуық   әлеуметтік көмекке зәру тұрғын­дарға түрлі әлеуметтік көмектер көрсетіледі. Жыл сайын 2 мыңдай  адам тұрғын үй көмегін алса,    зейнеткерлерге қо­ғамдық көлікпен қатынауда 50 пайыз­дық жеңілдік қарастырылған. Ал  жасы 75-тен асқан қарттар   қаладағы қоғамдық көліктерде тегін жүре алады. Қалада ардагерлерге арналған түрлі  мәдени іс-шаралар өткізіліп тұрады. Дейтұрғанмен, бұл  зейнет жасындағы қарттарымыздың көңіл күйлерін толық қанағаттан­дырмайтыны анық.    ЭЫДҰ мүше елдер­де  зейнеткерлер алпыстан асқан соң зейнетақымен шектелмей   жаңаша өмір сүре бастайды. Ал біздің ата-әжелеріміз болса, үйден алысқа  шықпайды.  Біз қарттарды осы дағды­ларынан  арылтып, оларға қала өмірімен тығыз қарым-қатынаста болып, белсенді өмір сүрулеріне қажетті жағдай жасауы­мыз керек. Олардың бір-бірімен араласып,  өздерінің қалаған ісімен шұғыл­дану­­ларына, спортпен айналысып, денсаулық­тарын жақсартуларына, қаламыздың көрікті жерлерін аралап, табиғат аясына саяхаттауларына мүмкіндік беруіміз керек. Биылғы жылды Алматы қаласында  аға ұрпаққа қолдау көрсету мақсатында «Қарттарды қадірлеу жылы» деп жария­ладық. Ондағы басты  мақсатымыз да сол,  қаламыздың жасы егде тартқан  тұрғын­дарының белсенді өмір сүрулеріне қа­жетті жағдайлар жасау керектігін ескеріп, «Белсенді өмір сүру» жол картасын жасадық дей келіп, қала басшысы  Жол картасымен таныстыру үшін сөз кезегін Алматы қалалық Жұмыспен қамту және  әлеуметтік бағдарламалар басқармасы­ның басшысы Мейіржан Отыншиевке берді. Басқарма басшысы  «Белсенді өмір сүру» жол картасы бойынша атқарылатын жұмыс­тармен, ұйымдастырылатын іс-шаралар тізбесімен таныстырды.

М.Отын­шиевтің айтуынша, қалада жақын уақытта  «Бел­сенді ұзақ өмір сүру» орталығы құры­латын болады. Онда қарттардың дем­алысына, денсаулығына қажетті жағдай­лардың барлығы жасалып, әр адамның өзінің қалаған ісімен айналы­суларына қажетті жағдайлар жасалады. Сонымен қатар, 40-тан астам әлеуметтік клубтар құрылып, тіпті  әлемде баламасы жоқ агрокраудсинг жобасы қолға алынып, қарттарға арнайы көкөніс, жеміс-жидек өсіретін жер бөлініп, олардың ауылшаруа­шылығымен айналы­суларына да жағдай жасалмақ көрінеді.  Тіпті, қарттарымыздың ағылшын тілін үйреніп, әлеуметтік желіде замандас­тарымен сырласулары үшін компьютерлік оқулар ұйымдастырылатын болады. Талқыға ұсынылған жол кар­тасы жалпы көпшіліктің көңілінен шық­қанмен, әлі де  толықтырулар енгізу қажеттілігі ескер­тілді.  Талқылау бары­сында арнайы «Ata – аpа» порталын құру ұсынылды.  Мұнымен қоса,  Бір­ыңғай САLL-center  құру да қарас­тырылған. 100-ге тарта мәде­ни іс-шаралармен қатар, зейнеткерлерге арнал­ған бос жұмыс орындары жәр­меңкесін өткізу жоспарланыпты.  Жол картасының  ең басты да маңызды бөлігі – ұрпақтар үндестігі, жастар мен егде адамдардың үйлесім табуы. Ол үшін біріккен  экскур­сиялар, ойындар, түрлі шаралар қарас­тырылған деді өз сөзінде Алматы қалалық Жұмыспен қамту басқар­масының басшысы Мейіржан Отыншиев.

Қалай дегенмен де, қаламызда тағы бір өркениетті, рухани жаңғыруға жол аша­тын игілікті іс қолға алынды. Ең бастысы,   күні бойы екі қолы алдына сыймай көппәтерлі тұрғын үйлердің  алдын күзетіп отыратын  ата-апалары­мыздың  бос уақытын тиімді өткізулеріне жағдай жасалатыны қуантты.

 

Толығырақ

Ұқсас ақпараттар

Добавить комментарий

Ваш e-mail не будет опубликован. Обязательные поля помечены *